Geguritan Dyah Kurniawati

WANCI ESUK

Dening : Dyah Kurniawati

Si Angger nyangklong tas jumangkah alon

kairing donga sih katresnan biyung

kinanthi pangestu tulusing bapa

tumuju papan pasinaon 

niyat suci nyecep ngelmu

saking para dwija ingkang minulya

anuju kamulyaning urip utama

anggayuh luhuring budi

pedhal dipancal kebak semangat

bebarengan angin midid silir sumilir

puspa warna-warni mesem sadawane laku

ocehan manuk sesautan bungah gumuyu

bagaskara sumunar agawe pepadhang

semangat makantar kebak kabagyan

gage tekan pangggon ngudi kawruh

nyinau rumus, teori kanggo sangu urip ing tembe buri

alam uga paring pandonga

muga Angger katekan ing sedya

kagayuh sakabehing panjangka

karanggeh sadaya sing dipuja

kacekel pangarep-areping rasa

karangkul kinemulan sih katresnan wong tuwa

muga bagya mulya sapuputing yuswa

Gusti ngijabahi sakabehing donga

mugi rahayu sagung dumadi

dadakan siji pebruari 2023

KLUWUNG

  Dening : Dyah Kurniawati

Wanci sore sabubare udan

Langit padhang sumilaking kabagyan

Ocehing manuk sesautan

Kodhok ngorek dhisik-dhisikan

Gawe tentreming jaman

 

Katon wewujudan mlengkung ing tawang

Rumesep endah kasawang

Awarna ijo kuning abang

Uga warna liya ngrenggani awang-awang

Rinasa ayem tanpa was sumelang

Muji syukur konjuk mring Pangeran

 

Prakanca ayo padha jaga alam

Linambaran sih katresnan

Guyub rukun ngregengake pasrawungan

Lumaku nut bebener sadawane dalan

Tansah nyenyuwun mring panguwasa kahanan

Manembah Gusti panguwasa alam kelanggengan

 

(Madiun ngarepake sandyakala, 27-1-2023)

NGLURU DUNUNGING KAMULYAN

  Dening : Dyah Kurniawati

Sunare baskara saka brang wetan
Angete mrambat sajroning sukma
Ngaras saranduning sarira
Kang lagi tapa brata golek pangupa jiwa

Ing clepitan kinupeng gedhong magrong lan amba
Padha ceceker rekasane kaum papa sudra
Bebarengan kluruke jago nganti tumekaning angslupe sandyakala
Mung sadrema ngluru sapulukan upa

Wewalikane jagad liya
Para piyayi sajroning wisma bawera
Padha ongkang-ongkang ngguwaki brana
Nanging rasane urip rinasa sepa

Kuwi kabeh isine donya
Mung ngupadi urip mulya
Marsudi kabagyane jiwa raga
Kasampurnan kang tanpa upama 

Pinggir sawah panggah mewah, 26122021

(Kapacak ing Lensa Sastra - February 26, 2022

Geguritan Dyah Kurniawati)

 

NGRANGGEH KABAGYAN

Dening : Dyah Kurniawati

Ing ngendi panggone kabagyan iku?
Ing adoh kana, semu
Diplayoni nganti keplayu
Dikiter nganti digeguyu
Direwangi tapa mbisu
Diranggeh nganggo kayu
Dioyak sadawane pandulu
Ditunggu gogroke katiup sang bayu
Yen durung tekaning wahyu
Tangeh lamun bisa kapangku
Nembus jroning kalbu

Madiun ing wanci dalu, 28122021

(Kapacak ing Lensa Sastra - February 26, 2022

Geguritan Dyah Kurniawati)

 

NULADHA SUNARE BAGASKARA

Dening : Dyah Kurniawati

Semburat sumirat madhangi rat
Hambabar sunare tanpa kendhat
Mung mituhu dhawuhe kang nguwasani jagad
Sadrema nglakoni kuwajiban kanthi iklasing niyat
Kabeh iku patut tinulad
Leremna pikir supaya bregas sehat
Ngresepi peparingane Gusti kanthi nikmat
Ilangana watek sing doyan sambat
Ayo kabeh padha mertobat
Ngupadi sangu urip ing akhirat
Sadurunge tekane dina kiamat

Madiun karangkul angete srengenge, 31122021

(Kapacak ing Lensa Sastra - February 26, 2022)

 

AKU SAPA?

Dening : Dyah Kurniawati

Sepi kinemulan sepa

Nyenyet tan ana urubing jiwa

Nggrantes, ngenes rinasa

Suwung ra ana sapa-sapa

Amung rasa kang micara

Pitakonan ngebaki mustaka

Aku sapa?

Tangan kaangkat ing dhadha

Nyoba ngrapal donga

Kanggo ngusadani jiwa

Raga uga

Nenuwun mring kang Maha Sampurna

Muga isih kaparingan apura

Nggetuni sakabehing dosa

Kae delengen gumebyaring cahya

Sumusup jroning jiwa raga

Mligi titah kang kadunungan sukma

Nggayuh laku utama

Anuju kasampurnaning agama

Sowan mring kang Kuwasa

Gusti kang Maha Wasesa

 

(Siji pebruari rong ewu rolikur)

 

IBU

Dening : Dyah Kurniawati

Meneng tanpa gunem

Lathi kekunci bungkem

Sakabehing rasa mingkem

Gumuruhe dhadha sidhem

Kasingkirake sakabehe lingsem

Kairing sembah sungkem

Ragaku kagawa nyilem

Ngupadi rasa ayem

Kekepanmu agawe tentrem

Asih tresnamu bakal dakregem

Amem

 

(Madiun, Papat pebruari rong ewu rolikur

 

 

NGLANGLUTING DARING

  Dening : Dyah Kurniawati

Jumangkah nuruti laku

manut udhaling kalbu

tan ana kang kawetu

meneng amem tapa bisu

amung obahe pandulu

lan tajeming pangrungu

semu

Nglanglute kampus sekolahku

kelangan umyegmu

sepi...ora ana ger-geran gumuyu

gegodhongan kemrosak katiyup sang bayu

wektu terus lumaku

ing endi sakabehing murid-muridku?

mlayu

Balekna kabeh ing ngarepku

Aja kok rampas kabagyan iku

Bocah-bocah butuh luru ngelmu

Ora cukup mung bukaki buku

Nanging uga butuh pituture guru

Kang nresnani kayadene ibu

Ngelu

 

(Madiun ing tepining wektu

Wolulas pebruari rong ewu rolikur

8.58)

 

 

ANGSLUPE SANDYAKALA

  Dening : Dyah Kurniawati

Ing kene nguntapake angslupe sandyakala

Sandyakala kang gawa sakehing crita

Crita kang tansah katon saben sak obahe raga

Kae delengen isih ana pepadhanging candra

Pratandha isih ana kang bakal teka

Gusti wis paring dalan kanggo kita

Sing sabar ngadhepi sakabehing coba

 

Sandyakala kang tekane mung sedhela

Kasulistyane  mung sakedheping netra

Sandyakala kang gegulang manungsa kudu legawa

Legawa nalikane atiku katut kegawa angslupe sandyakala

Legawa nalikane sliramu gandheng wong liya

Senajan larane lara nembus jroning dhadha

Mugya bagya mulya nganti puputing yuswa

Madiun ing wanci surup, 21 Juli 2021

 

 

KOPI PAITE ATI

            Dening : Dyah Kurniawati

Anglaras ilining kopi

Sinandhing simbok lenggah ing kursi

Nyawang pethetan kang nambahi asri

Senajan nglanglute ati tan bisa diselaki

 

Wewayangan jaman kawuri

Kekiteran, lelunjakan katon ngiwi-iwi

Jejogedan sajroning paite kopi

Sliramu mesem ing suwalike sepi

 

Mak gragap lungguh njejeri

Gronjalan ing telenging ati

Luh dleweran tan ana sing ngelapi

Sepi....lathi kaya kekunci

 

Tak jiwit lengenku iki

Ah ....... pranyata mung ngimpi

Sliramu tansaya nyemoni

Ing saben srupute kopi

 

Kuwiran  ing  suwalike wewayangan kang kebak kenangan

Telulas Pebruari rongewu rolikur

 

TRESNA AMARGA LEGAWA

Dening : Dyah Kurniawati

Ngranggeh prastawa rong puluh taun ika

Ujug-ujug sliramu njedhul tanpa kinira

Mak bedunduk nembung atiku marang biyung bapa

Si ibu seminggu ora kersa ngendika

Bingung miwiti ukara

Gek piye gek nganu gek duka

 

Nggembuleng jroning dhadha

Tan ana obat apadene usada

Kejaba aku nrima legawa

Menehake atiku kanthi lila

Didadekake sigarane nyawa

Marang wong liya dudu sapa sapa

 

Sumedhot jroning rasa

Ora tega nyawang wong tuwa duhkita

Tak pasrahke jiwa raga

Amrih kabeh bagya mulya

Kinathen sakabehe donga

 

Iya...gawanen aku lunga

Mapag kaendahane swarga donya

Ngupadi jerone asmara

Lumantar asih sajroning tresna

Nggayuh sampurnane agama

 

Madiun nandhang wuyung kang kayungyun

15 Pebruari 2022

Tabuh 15.10 WIB

NRIMA SAJRONING TRESNA

Dening : Dyah Kurniawati

Dudu bandha apamaneh brana

Ora deleng rupa utawa warna

Ya mung laku sing prasaja

Nyebabake atiku legawa

Lila kokdadekne sigarane nyawa

Senajan ing kene kana

Nawani kaendahan marcapada

Janjeni gumebyare donya

 

Ning atiku ora kegawa

Katresnanku tuwuh ngrembaka

Dumunung ana ing rasa

Amung jenengmu ing sebutane puja

Anggayuh bagya mulya

Kanthi urip saderma

Nut laku ginarise kang Kuwasa

Pasrah sumarah tumuju sumringah

 

Gawanen aku lunga

Nyecep kabagyan Swarga donya

 

Madiun ing kekeban garwa

Parak esuk 4.18 , 18022022

 

 

LAKUNING TRESNA

 Dening : Dyah Kurniawati

Mbaleni  sajroning ngambali

Nandhang wuyung kang kayungyun

Ora  den ngerteni saka ngendi tekane

Mak tratab ujug-ujug kemanthil

Mbebeda wewayangane sadawane impen

Saben sakedhepe netra

Kerep katut ing unjalan ambegan

Mung sliramu sing tak antu

 

Wuyung iki bali angreridhu

Sawise kapendhem sajroning kalbu

Kasimpen primpen rapet dhipet

Nanging kabeh mau wudhar

Nalika sliramu njedhul saklebatan

Lan  wis gawe horeging atiku

Mobat-mabit katiyup sang bayu

Leder pindha es kasorot srengenge

Angluh, nglumpruk tanpa daya

 

Nunggu pepesthen saka Gusti

Aku mung memuji

Awake dhewe  nyawijekne ati

Kaya wingi uni

Netepi janji suci

 

Selikur Pebruari ing dalune Madiun

21.26 WIB

 

Matur Nuwun 2021

Dening : Dyah Kurniawati

Ing pucuking dina 365 pungkasing  warsa 2021

Napak tilas lelakon kawuri

Sakabehing prastawa kumlebat den interi

Sajak kepengin bali hanggondheli

Kabeh lumaku nut lakoning Gusti

Manungsa hamung mersudi

Mrih bisa nyawiji amemuji

Tumuju mring ridha Illahi

Panyawang tumenga mburi

Nyoba nggrayahi ajining dhiri

Tumindak lethek hanjejemberi

Mugya diampuni aja den baleni

Gumawang ing akasa lampahan kang endah mranani

Mesem marem merak ati

Nyuwun ngambali anggone leladi

Ngupadi urip mulya widada basuki

Matur nuwun 2021

Pangorbananmu resik suci

Ngancani lakuku tekan saiki

Nglewati rolas sasi kanthi senenging ati

Dalune Madiun nguntapake rong ewu selikur kanthi semedhoting ati

21.55 WIB

31-12-20

Pupusing Jiwangga

 Dening : Dyah Kurniawati

Angenku kebentus ing antarala

Nembus suwalike  akasa

Jejogedan sadhuwure antariksa

Nuju gegayuhan kang utama

Upamane...umpama bisa

Nanging ngen-ngen iku musna

Mbarengi mrucute impen kang nggegana

Dhuuuh...enggal tak oyak sakuwate angga

Sruuuutttt ...lakuku kandheg ing bantala

Semplah ati iki tanpa daya

Coklek poklek nembus jroning dhadha

Ora kuwasa nandhang duhkita

Donya ambles sakedhepe netra

Wuss...Pupus tan ana usada

 

Madiun  sumedhot krungu warta sungkawa, 09012022

  

 

Sumirat soroting Bagaskara

 Dening : Dyah Kurniawati

Sumorot clorote bagaskara

Sumringah ing suwalike megha

Mentrong-mentrong madhangi jiwa

Kang lagi nandang sungkawa

 

Wis meh rong warsa kinunjara

Kinupeng corona kang ngambra-ambra  

Kebak sumelang sajroning sukma

Raga wugya tan bisa suwala

 

Kae delengen ing brang wetan kana

Tronthong-tronthong nylorotake cahya

Cumlorot mbalekake daya

Pratandha corona bakal lunga

 

Jenggelek donya ning tetep waskitha

Gumregah ngudi endahing dina

Pagebluk wis musna sirna

Muji syukur mring kang Maha Kuwasa

 

Madiun ngudi endahing nirmala, 14012022

 

 

MAPAG KABAGYAN

 Dening : Dyah Kurniawati

Bismillah golek kabagyaning ati

Mugi tansah gawe mareming ati

Akeh panjangka kang kudu dakupadi

Bakal dakudhari lan dakgondheli

Ben ora kabur kaya sing wingi uni

 

Saben wulan  kebak wewadi

Diwiwiti ing  tanggal siji

Ora kendhat  memuji

Mugi tansah pinaringan sihing Gusti

Kaberkahan tetep nyawiji

 

Taktinggalake sakabehing lelara wingi

Kanthi sumedhoting ati

Daksimpen wewayanganmu kanthi premati

Sepira gedhene rasa pangrasa iki

Mung aku lan sliramu kang meruhi

 

Siji Pebruari 2022

NYAPIH RASA

Dening : Dyah Kurniawati

Glibagan glimbang-glimbung

Ngubengi paturon sepi tembung

Minger ngiwa bali nengen mapakne balung

Kelop-kelop kaya wong linglung

Kancilen nganti weteng kembung

Semriwinge maruta nyebabake mekungkung

Katisen kayadene ingkung

 

Abot pindha nyunggi gunung

Ngrogoh pangrasa kang keduwung

Langite isih mendhung

Ngarep-arep jumedhule kluwung

Nglanglut temlawung

Bingung

 

5 Maret 2022

Gurit Panglipur Wuyung

Dening : Dyah Kurniawati

 

Kapang rinasa nembus jroning dhadha

Nunjem tekan pucuking rasa

Tan ana kang bisa paring usada

Ya mung sliramu dhuh ...kusuma

 

Wis nyoba mertamba mréné mrana

Jampi Jawa tekan obat manca

Kabeh tan bisa pinercaya

Wuss...ora kaya sing diiklanna

 

Ing kene tansah tak pikirna

Kapan bisa nyuntak sakabehing rasa

Meh pedhot rasane nyawa

Nunggu sliramu tan ana warta

 

Jangkrik ngerik nambahi duhkita

Kodhok ngorek ora kendhat nyuwara

Sajak ngece si lara branta

Banyu mata pratandha jerune asmara

 

Madiun ngantu sigaraning nyawa 29122021

Gegadhangan ing Pasisir pelang

Dening : Dyah Kurniawati

 

Jumlegure ombak nyempyok watu karang

Kasusul swara panjerit  menggalih sing ana sebrang

Nangisi sakabehing panandhang

Kang tansah dadi pepalang

Samubarang sing digegadhang

 

Raga nglokro ora bisa tumandang

Arep sambat wedi tansaya kondhang

Trima  nangis bae tinimbang wirang

Brebes mili pindha tirta  saking tawang

gumrojog  tumiba ing talang

 

Tak antu tekamu ing pasisir Pelang

Ngrakit dina endah tanpa was sumelang

Tak rewangi kaya wong ilang

Nanging sliramu tan bisa kesawang

Mabur ing awang-awang

 

Madiun rasa Pasisir Pelang, 31122021

 

CANDRA BAE DUDU LINTANG

.Dening : Dyah Kurniawati

Ninggalake lintang ngiter playune candra

Pindhane

Jarene jare

Jenengmu tumangsang ing pojoking atiku

Tansah ngrenggani dina-dina endah

Kaya dene lintang kang ana ing awang-awang

Sumunar ora mung ing wanci dalu

Sawayah-wayah saben esuk tumekane dalu

Sumunar ana ing atimu lan atiku

Kuwi biyen, kuwi dhisik jaman kae

Isih mambu kencur

Nalikane sisi bae durung jegos

Nanging.....

Saiki lintang wis ketutupan mendhung

ora bakal bisa sumunar

Lan...ora oleh sumunar maneh

Ora...aja mbok cloroti terus

Aku wedi....

Nalika sunare lintang mintip-mintip

Ngungak saka suwalike mendhung

Gage tak kipatake

Tak tinggal ndhelik adoh

Mlayu sipat kuping

Ndhepipis ing clepitane eseme candra

Nyuwun pangayomane

Ngaling-alingi lintang sing wiwit jenggelek maneh

Sunare lintang saiki ngemu teges kang ora sabaene

Emoh...aja mbeda terus

Aku wis duwe candra

Tak  ajap  bakal tak antu cahyane

Nganti raga wis koncatan nyawa

Aku wis ayem, marem lan tentrem

Candra bae dudu lintang

 

Madiun  nglaras pletheking bagaskara

24122021

 

Mapag tumekane Warsa 2022

Dening : Dyah Kurniawati

 

Gilir gumantine warsa ora rinasa

Kabeh kang dialami manungsa

Sejatine mung nggayuh urip prasaja

Nganti pungkasaning warsa

 

Ana uga sarira sing tansah rumangsa

Uripe kebak jejember lan dosa

Kanthi gumantine warsa

Didadekne srana kanggo dedonga

 

Angga liya ana sing uripe beda

Wis ngrasakne tentrem mulya

Tan kurang sawijining apa

Tansah muji sukur mring  kang Maha Wisesa

 

Gumantine warsa kaya lumrahe dina

Mung sakedheping netra

Sesuk wis makarya mburu upa

Kanggo nyambung yuswa

 

Iku kabeh mung gebyaring donya

Mula aja nganti tumindak ngliya

Kabeh wis digarisne sing Kuwasa

Manungsa mung bisa marsudi lan dedonga

 

Madiun ing pungkasane warsa 2021

 

PESISIR SADRANAN LAN USADA BRANTA

Dening : Dyah Kurniawati

 

Rong dasa warsa kapungkur

Merpati putih sajodho lagi ngrantam dina endah

Nglungguhi watu karang sapinggire samudra

Kala-kala sikile kasempyok ombak muncrat sarandune raga

Sinambi tumenga ing akasa kang tanpa upama

Angen-angene ngumbara tekan antarala sing adoh kana

Ora ana sing bisa hanggraita

 

Jumlegure ombak samudra nambahi kekesing jiwa

Mudha tumaruna kang lagi nandhang branta

Lagi nyoba ngusadani lelara sajroning dhadha

Meneng amem tanpa ukara

Amung rasa kang micara

Menawa tresna iku ora bisa dipeksa

 

Pasisir Sadranan wis dadi seksi setya

Merpati sajodho mung bisa dedonga

Amung kawelasaning Gusti  Maha Wicaksana

Kang bisa ngatur uripe  manungsa

Muga bagya mulya sapupute yuswa

 

Pesisir Sadranan kebak kabagyan, 22-12-2021

 

PUPUSING PANGANGEN SEMU

Dening : Dyah Kurniawati

 

Angen iki banget angreridhu

Angawe-awe ing wanci dalu

Angreronce sadawane impenku

Tansaya bebeda sakedhepe netraku

 

Nalika krenteg iki wis tumangsang ing pojoking kalbu

Raga iki kumudu-mudu lumayu

Nemoni  pangangen kang isih semu

Tansaya nggrangsang ati iki saben ana sing geguyu

Nututi angen kang sedhela maneh bakal kadulu

 

Nanging angen iki pupus sadurunge lumaku

Tumekane kabar kang kagawa sang bayu

Dadekake atiku tansaya remuk rempu kaya awu

Pangangen iki pupus sadurunge kawetu

Angen kang isih tumangsang sajroning gulu

Apa bakal bisa katuju?

Amung wektu kang bisa ndulu.

 

Madiun ngarepake tumekane dalu

 9 September 2021

Sandyakala Ndayani Rasa 

Dening : Dyah Kurniawati

 

pepanggihan wanci sandyawela wingi amung sakedhepe netra

nanging kasil ndhudhah rasa kang kinubur mangsa

rasa kanggo nyebarake rasa kaya apa kang dakrasa

gegayuhan puluhan warsa kapungkur bali  njenggelek

angawe-awe ing ngarsane aksa 

angreridhu sajroning supena

gumuruh swara jero jaja

ngudhalake sakabeh panjangka

kumudu mlayu nanging ora keplayu

dakcoba ngranggeh tansaya nyata sakehe panggodha

ajar  miber ning kesangsang ing pucuking mega

muntub malah ambles ing suwalike bantala

munggah antarala kepontal tumekan dhasaring samodra

lan, sasuwene iki angen iku mung dadi pangangen 

 

patemon kang mbarengi angslupe sandyakala

muga minangka pratandha mletheke bagaskara

dadi srana amiwiti dina 

merdi  lestarine seni, sastra lan budaya ing bumi nuswantara

rasamu uga rasaku amung siji

bebarengan nyekseni eseme bagaskara saka brang wetan

sumunar madhangi jagad gumelar

gereten aku, Dhimas Tanjung

nututi wangine kembang tanjung sumebar kagawa samirana

senadyan wangine kasil nganglang jagad mokal kagayuh

dakcoba ngaras wangine sekar tanjung saka kene

sajroning ngempet rasa dakselipi donga

enggal kasedya nyawijine rasa agawe tentreming sasama

mugi rahayu sagung dumadi

 

 

Pinggir sawah panggah mewah, 7-8-2022

(Jujur, gurit iki katulis sinambi  dleweran luh ngempet sakehing rasa kairing  “Album Fileski”)

 

 

Biodata Penggurit

Dyah Kurniawati. Sawijining wanita kang kayungyun marang sastra lan budaya Jawa. Lulusan Pendidikan Bahasa lan Sastra Daerah UNESA iki uga nulis cerkak, cerpen, puisi, resensi buku lan liyane. Saiki dadi buruh momong ing MTsN Kutha Madiun .

 

 

Lampiran:

https://lensasastra.id/2022/02/26/geguritan-dyah-kurniawati/

http://www.negerikertas.com/2022/08/sandyakala-ndayani-rasa-dyah-kurniawati.html?m=1

DJAKA LODHANG