Crita ANA-ANA BAE

  

 BAKUL ANEH, DITUKONI ORA OLEH

dening: Dyah Kurniawati 

Mulih saka nyambut gawe hawane panas banget. Tenggorokanku garing pengin disiram karo sing seger-seger. Sepeda motor taklakokne alon-alon, sirahku tolah-toleh ing sapinggiring dalan mbokmenawa ana bakul es utawa omben liya sing cocok karo hawa awan iki.

Jelalah sadawane dalan nganti meh tekan omah ora enek bakul omben sing  bukak. Biasane Es oyen Bandung, es sari tebu, es campur, es cincau lan es dawet umbrukan turut dalan sing sabendina takliwati. Kok ya pas dipengini malah padha prei.

Sidane mandheg bakul es degan kulon omahku. Kaya biasane aku tuku loro  dikerikne pisan, regane 11 ewu. Bayanganku neng omah kari nyruput, masiya tanpa gula lan es  wis seger alami.

Nanging lagi wae motorku arep tak jagang, bakule degan kandha,

“Bapake wau sampun mundhut kalih, nembe mawon kok Bu.”

Aku rada mikir dadi mung jawab, “Oh.”

Weruh aku meneng rada bingung, mbak bakul njlenterahake,

“Tinimbang dobel-dobel bu, napa mangke menawi kirang mundhut malih.”

“Nggih mpun Mbak, matur nuwun.”

Sidane aku ora sida medhun lan motor  takstater maneh nerusake laku.

Tekan omah kok lawangku isih digembok, berarti bojoku  durung mulih saka kerja. Penasaran gage tak bukak kulkas mbokmenawa bar ndeleh degan njur metu maneh. Nanging neng kulkas ora enek degan sing tak goleki. Saking penasarane bojoku langsung tak telpon,

“Mas, jenengan wau mundhut degan ta?”

“Degan apa? “ Bojoku nyauri karo rada bingung.

“La jenengan wau mpun kondur dereng?”

“Ya durung lah,  kan iki durung jame mulih?”

“Nggih mpun.”

Telpun taktutup. Aku dheleg-dheleg neng kursi lan ngombe banyu putih saka morong. Sinambi mbayangke duduh degan aku isih mikirne  bakul degan mau. Aneh, ditukoni ora oleh. Ana-ana bae, dilarisi kok ora gelem. Hehehe...

 

Madiun, 23 Juli 2022

# Wis kapacak ing kalawarti Jaya Baya No. 3 Minggu III September 2022, kaca 48.

Biodata Pangripta: Dyah Kurniawati. Sawijining wanita kang kayungyun marang sastra lan budaya Jawa. Lulusan Pendidikan Bahasa lan Sastra Daerah UNESA iki uga nulis cerkak, cerpen, puisi, resensi buku lan liyane. Saiki dadi buruh momong ing MTsN Kutha Madiun .

Lampiran: